Kyakyatawa Dole: Saurayi Da Amaryar Mafarki

Bayan na gama shiryawa zan fita ofis, sai amaryata ta fito da shagwaɓa ta riƙe hannun jakar da ke rataye a kafaɗata. Ta ce "Darling yau a gida za ka zauna ka yi min kitso ko?"

Saurayi Da Amaryar Mafarki

Hoto: Thais Varela/Unsplash

Sai na juyo na dube ta tare da dafa kafaɗarta.

Na ce mata "Amaryata ki yi haƙuri sai na dawo,".

Cikin tattausar murya ta ce "To My Dear.".

Na tafi har na je bakin ƙofa sai na ji ta ce : "Honey". Juyowar da zan yi sai ta yi min wani kallo mai karya zuciya.

Ban san lokacin da na saki jakar da ke hannuna ba, nan take na yo kwana, na zauna abakin doguwar kujera na ce "Zo na yi miki kitson".

Na ture ɗan kwalin da ke kanta na kama lallausan gashinta ina ja tare da shafawa.

Ban ankara ba, sai da na ji saukar mari, Raasss! Taasss! na miƙe a firgice.

"Wanne irin iskanci ne wannan za ka dinga ja min gemu ina barci?"

Ashe wai mafarki nake yi.

Gemun yayana (Ustas) da muke maleji a katifa ɗaya na kama ina ta faman ja. 

Ya yi ta faɗa a fusace.

Kwana na yi cikin takaici ni ban gama mafarkin ba kuma na sha mari.

Gwaurantaka ba ta yi ba, ku je ku yi aure.

Tushe/Asali: Babu hanyar tabbatar da ainihin mamallakin rubutun, saboda rubutun yana yawo ne ba tare da asalin sunan mamallakin shi ba, amma mun yi gyare-gyare a rubutun domin ya nishaɗantar da ku tare da gamsar da ku.

Karanta Sauran anan»

Yadda Za Ku Sauya Rayuwar Ku A Rabin Shekara Kacal (4)

Canji abu ne mai sauƙin faɗa, sai dai samar da shi yana da matuƙar wahala, amma kuma sakamakonsa akwai daɗi ƙwarai da gaske. Domin fahimtar inda aka dosa dole sai mutum ya koma baya daga fitowa ta farko (1). Latsa nan don komawa ga fitowar farko.

Ka fita daga sabgar mata

Hoto: Damir Khabirov/iStock photo 

5. Ka tarbiyantar da kanka akan tashi barci da wuri.

Wannan ɗabi'a ce mai ƙololuwar tasiri sannan mafi yawancin manya-manyan mutane suna siffantuwa da ita.

Ka daidaita yininka/wuninka ta yadda za ka kammala duk wani aiki naka ka kwanta kafin 10:00 PM na dare, sannan ka tashi ƙarfe 4:00 AM na safe.

Hakan zai ba ka ƙarin awanni guda 2 zuwa 4 kafin yinin /wunin wasu ya fara. Wannan lokacin zai ba ka damar shiryawa yininka/wuninka da kyau, yin karatu, motsa jiki, ko ibada da addu'o'i.

Duk rintsi kada ka bari ƙarfe 5:00 AM ta asuba ta wuce kana kwance. Rayuwa guda ɗaya kake da ita, ta yaya za ka yi barcin sama da ɗaya bisa ukunta (1/3)?

6. Ka yi watsi da shagala.

Na yi bayani game da shagala a gaɓa ta uku. Maganar gaskiya ita shagala tana da nau'o'i daban-daban masu wuyar lissafawa.

Amma ina so ka gane cewa duk lokacin da ka fuskanci manufarka kake ƙoƙarin hawa tafarkin nasara, akwai wasu ƙugiyoyi da za su riƙe ka su ƙanƙame ka.

Duk wani abu da zai tauye ko ya salwantar maka da ɗaya daga cikin waɗannan abubuwan da zan lissafa, to ba za ka isa ga manufarka ba sai ka yi watsi da shi:

- Lokaci (Time).

- Tunani (Attention).

- Kuɗi (Money).

- Sha'awa (Lust).

- Lafiyar Jiki (Health).

To ka matso kusa ka ji ɗan uwa.

Idan har ka damu da daidaita al'amuran rayuwarka, to dole ne;

- Ka fita daga sabgar mata, soyayya ba taka ba ce.

- Rayuwar ƙarya da ƙoƙarin burge mutane ba naka ba ne.

- Kalle-kallen TV da yawan hawa shafukan sada zumunta ba naka ba ne.

- Al'amurra masu tashe ko yayi (trends) su bar ɗaukar hankalinka.

- Bibiyar labaran yau da kullum da al'amuran siyasa bai da amfani gare ka.

- Shaye-shaye zai sa ka yi baƙin jini a cikin mutane, ka mutu a wulaƙance sannan ka haɗu da fushin Ubangiji.

Waɗannan abubuwan dukkaninsu guba ne da suke cutar da kai. Ka gaya min mene ne amfanin karantawa ko kallon labarai a rayuwarka?

A yau dai kam mai karatu na ƙalubalance ka, ka cire dukan waɗancan abubuwan da na lissafa daga rayuwarka.

A cikin wata 6 masu zuwa, kawai ka maida hankali akan gina kanka ta kowacce fuska.

Ka gina jikinka ta hanyar kula da lafiyar jikinka.

Ka gina ilimi da basira ta hanyar koyo, bincike, da karatu.

Ka gina alaƙa mai kyau da mutane masu himma da za ka amfana da su.

Ka gina aljihunka da asusun bankinka domin ganin ka fi ƙarfin buƙatun yau-da-kullum.

Ka samu gogewa da ƙwarewa ta hanyar maida hankali akan abu guda 1 tsawon watanni 6.

Idan ka ɗauki waɗannan abubuwa da muhimmanci, tabbas rayuwarka za ta canza na har abada.

7. Ka gina jiki mai ƙarfi.

Dole ne kana buƙatar ka zama mai cikakkiyar lafiya da ƙarfi na gangar jiki domin ka iya aiki da gaske don cikar burinka.

Nawā, kasala, gajiya, ragwanci, da son jiki, duk waɗannan ba abin da ke janyo su face raunin jiki.

Idan kana so ka ci nasara a gwagwarmayar rayuwa, dole sai ka zama jarumi. Shi kuma jarumi ba'a samun sa da rauni a ko'ina.

Zuciyarsa tana da ƙwari kamar yadda gangar jikinsa take da ƙarfi.

Don haka bayan ka gina jarumtaka ta zuciya ta hanyar yarda da kanka, neman ilimi, rashin tsoro da sauran hanyoyi da muka ambata, dole kuma ka gina gangar jiki mai ƙarfi don zama cikakken jarumi.

A kullum, ka ware aƙalla minti 30 zuwa awa ɗaya domin motsa jiki da aikata ayyukan da za su ƙarfafa gangar jikinka.

8. Ka doge/dage da koyo da neman ilimi.

Abokina ka nemi ilimi, ba za ka taɓa zama sama da abin da ka sani ba a rayuwa.

A kullum ka ware a mafi ƙaranci, minti 30 zuwa awa 1 domin karanta aƙalla shafi 10 zuwa 20, da za su gina maka ƙwaƙwalwa sannan su haɓaka tunaninka da basirarka.

Karatu ne kaɗai zai ba ka damar koyon tajriba/ƙwarewa da gogewar da mutane suka samu a tsawon rayuwarsu cikin yini/wuni ɗaya ko 'yan kwanaki.

Daga ranar da ka daina neman ƙarin ilimi, rayuwarka za ta fara daskarewa ta daina ci-gaba.

Ina so ka amsa wa kanka waɗannan tambayoyin;

1. Littafai nawa ka karanta daga farkon shekarar nan zuwa yanzu?

2. Sau nawa kake zuwa majalisi a mako ko kake sauraren karatuttukan malamai?

3. Yaushe ne ƙarshen lokacin da ka halarci wani taro na ganawa da musayar ra'ayi tsakanin masana?

4. Kwasa-kwasai nawa ka koya daga yanar gizo domin gina kanka a wannan shekarar?

5. Akwai bambanci a iliminka da ƙwarewarka da gogewarka tsakanin shekaru 3 baya zuwa yanzu?

Daga sanda ka zama mai ƙoƙarin karance-karance, rayuwarka za ta fara bambanta da ta sauran jama'a.

Babban ƙalubalen da ke hana mu samun ci-gaba a rayuwa ba komai ba ne face jahilci.

Akwai ƙwarewa da dabarun kasuwanci na zamani da hanyoyin neman kuɗi da yawa da za su inganta rayuwarka, amma ta yaya za ka san su idan ba ka neman ilimi?

Ina so ka nutsu ka zaɓi wata ƙwarewa (skill) ko fage guda 1, ka tattara hankalinka akan sa tsawon watanni 6.

Idan kai ɗan kasuwa ne, ka dage da koyon ilimin kasuwancin zamani, ka san kasuwancin da kake yi a ilimance, sannan ka nemi ilimin haɓaka kasuwanci (business development).

Ko ka yarda ko ba ka yarda ba, ilimi shi ne zai iya magance maka duk wani talauci da ke damun ka.

Talauci sakamako ne na ƙaramin tunani da jahiltar hanyoyin neman kuɗi, shi yasa wasu masana suke cewa, "Iya yawan saninka, iya yawan samunka.".

Ilimi shi ne zai wayar maka da kai ya buɗe idanunka ga abin da ba ka sani ba, sanann ya nuna maka hanyoyin aikata abin da mara wannan ilimin bai isa ya yi ba.

Ku biyo mu  a fitowa ta gaba domin karanta  mataki na 9 zuwa na 11. Kuma na ƙarshe a cikin jerin matakan sauya rayuwa a wata 6 kacal.

Ku ci-gaba da bibiyar shafin nan namu domin ci-gaba da samun saƙonnin da za su taimaki rayuwar ku tare da  taimaka muku ga cimma burin ku da muradin ku cikin sauƙi duk a kyauta. Za ku iya sanar da sauran mutane sunan wannan shafin domin su ma su shigo su amfana kamar yadda ku ma kuke amfana.

Tushe/Asali: Hausa Motivation

Karanta Sauran anan»

Kalli Hoton Umar M. Shareef Da Aisha Najamu

An ɗauki waɗannan kyawawan hotunan ne a yayin ɗaukar bidiyon waƙar Soyayya Karɓaɓɓa ta mawaƙi Umar M. Shareef.

Umar M Sharif

Hoto: Kinga team

Hotunan sun ɗauki hankula sosai a shafukan Sada Zumunta duba da yanayin yadda aka ɗauki hotunan, wanda hakan ya taka muhimmiyar rawa sosai wajen ƙayatar da al'umma daga sassa daban-daban na faɗin duniya.

Aisha Najamu

Hoto: Kinga team

Ƙalli ƙarin wasu hotunan a ƙasa:

Aisha Izzar So da Umar M. Shareef

Hoto: Kinga team

Umar M. Sharif da Aisha Najamu

Hoto: Kinga team

Fatan hotunan sun ƙayatar da ku. Ku ci-gaba da kasancewa tare da mu domin samun ire-iren su.

Karanta Sauran anan»

Zafafan Kalaman Karfafa Gwiwa Na Musamman

Dole ne ka tashi ka jajirce domin cikar burinka. Mutane  da dama suna mutuwa cikin mummunan talauci ba wai don ba su da ƙarfi ko wayewa ba, sai don sun rasa jajircewa a kan abun da suka saka a gaba, kowanne mai kuɗi ko mai mulki idan ya ba ka labarin wahalar da ya sha sai ka ji kamar ka yi kuka amma a yau ya zama abun kwatance ga sauran al'ummar duniya. 

Kalaman Ƙarfafa Gwiwa  Na Musamman

Hoto: Ramsey voice

Marubuci:- Abdallah Aliyu Saint

Shin labarin Albert Einstein bai zo maka ba?

  

Mutumin da aka haifa har ya shekara huɗu ba ya iya magana har ya kai shekara tara 9 Malam Albert maganarsa ba ta fita ya kan yi magana kamar mai shanyayyiyar murya, wasu malamansa ba su taɓa tunanin shi ba nakashashshe ba ne ta ɓangaren harshe.

A shekararsa ta 16 a  duniya wato a 1895 ya kasa cin jarrabawar shiga makarantar Swiss Poly Technic wadda take a Zurich amma hakan bai karyarwa da Malam Albert gwiwa ba, bayan shekara ta zagayo ya ƙara gwadawa ya samu nasara da ƙyar.

Bayan kammala karatunsa na jami'a ya fita da kwalin da ba yabo ba fallasa ya ci gaba da watangaririya a titi na rashin tabbas ɗin inda ya kama.

Da ƙyar ya samu aikin siyar da inshora yana bi ofis-ofis domin tallata hajarsa, bayan shekaru biyu ya ga hakan ba wani ci-gaba ya nemi aikin koyarwa bai samu ba da ƙyar ya samu aikin mataimakin magatakarda a ofishin bada lamuni na swiss wato a turance ana kiransa da (Patent clerk at the Swiss Federal Office for Intellectual Property in Bern.)

Albert Einstein yayin gabatar da wani jawabi kan Kimiyya da Wayewar Kai a 1933

Hoto: Keystone/Getty

Tabbas shi ne wannan mutumin da a yau  duniyar ilimi take tunƙaho da shi musamman ɓangaren ilimin kimiyya ta ɓangaren physics, tasirin photoelectric da Einstein ya gabatar  ta haka ne aka samar da  bom ɗin Atom, haƙiƙa Albert Einstein ɗaya ne daga cikin manyan masana kimiyya na ƙarni na 20, kodayake shi a matsayinsa na masanin kimiyya, ba shi da hannu kaitsaye a ƙirƙirar bam ɗin atom, wasiƙar da ya rubuta zuwa ga shugaban Amurka na lokacin ya fara farawa. Daga baya ya yi magana a bainar jama'a don yin kakkausar suka kan amfani da bama-baman nukiliyar, wanda ya kai ga halaka mutane da dama a japan.

Shin ko ka san malam Albert Einstein har koyarwa ya nema a makarantar sakandire bai samu ba saboda rashin kyawun sakamakonsa na jami'a?

Tabbas jajircewar Sheikh Albert Einstein ce tasa yau shekara 67 da yin mutuwarsa ake matuƙar ji da shi a ɓangaren kimiyya da sauran ilimai na turawan yamma, ya kuma kasance jagoran dukkan masana falsafa ta ɓangaren kimiyya da fasaha kuma mutumin da duniya ba za ta manta da shi ba tabbas.

"I want to go when I want to go. It is tasteless to prolong life artificially. I have done my share; it is time to go".

Fassara

"Ina so na tafi lokacin da nake son tafiya. Ba shi da ma'ana  don tsawaita rayuwa ta hanyar wucin gadi. Na yi rabona; lokacin tafiya ya yi".

Wannan itace maganar ƙarshe ta imamuna Albert Einstein.

Makomar mu tana ga abubuwan da muke aikatawa a yau.

Kada rashin nasara ya sa ƙarfin gwiwarka ya ragu wani lokacin da ma sai rayuwa ta juya maka baya hikimomin nasara suke zuwa ƙwaƙwalwarka.

Karanta Sauran anan»

Karanta Hikayar Tajiri Da Ifiritu (1)

A zamanin da, a wani babban gari, an yi wani babban attajiri, mai yawan dukiya, mai yawan tausayi da taimakon talakawa.

Hikayar Tajiri Da Ifiritu

Hoto: Gutenberg

Marubuci: Bukar Mada

Wata rana attajirin nan ya fita bayan gari yawo shi kaɗai domin shan iska, sai ya tsaya domin ya huta a ƙarƙashin wata itaciya mai sanyin inuwa. Ya fito da gurasa da dabino da ruwa daga cikin jakarsa, domin ya ci ya kuma sha ruwan kafin ya wuce gaba.

Bayan ya gama cin gurasa sai ya ɗauko dabino yana ci. Yana cikin cin dabinon nan sai ga wani Ifiritu (aljani), mai girman jiki, tamkar itaciyar kuka, mai tsayin gaske, tamkar itaciyar rimi, da jajayen idanu, tamkar garwashin wuta. Ya fito riƙe da takobi a hannunsa, ya ce da wannan attajiri, tashi na kashe ka tamkar yadda ka kashe ɗana.

Tajiri ya ce, “Ta yaya na kashe ɗanka?”

Ifiritu ya ce, “Yayin da ka ci dabino ka yi jifa da ƙwallon ya sami ɗana a kirji har ya faɗi ya mutu. Babu makawa yanzu in ɗau fansa, in kashe ka tamkar yadda ka kashe shi.”

Tajiri ya ce, “Ka sani ya kai wannan Ifiritu akwai bashi mai yawa a kaina. Ka bar ni in tafi gida, tsawon shekara guda, in bai wa dukkan mai haƙƙi haƙƙinsa, sannan in komo nan ka aikata abin da ka yi nufi a kaina, za ka same ni mai cika alkawari, haka Allah ya kaɗɗara.”

Ifiritu ya yarda da bukata tasa.

Tajiri ya komo gida, ya faɗa wa iyalansa da danginsa da abokansa dukkan abinda ya faru da shi, suka yi ta kuka, kuma ya biya dukkan mai bin sa bashi haƙƙinsa. Bayan shekara guda ya koma inda suka haɗu da Ifiritun nan ya zauna yana jiran fitowarsa.

Yana nan zaune yana jiran abinda zai same shi, sai ga wani tsoho tafe, ya na jaye da barewa, da igiya a wuyanta. Ko da tsohon nan ya iso wurin tajirin nan sai ya ce masa, “Bawan Allah, me ya zaunar da kai wannan wuri? Hala ba ka san cewa wannan wuri matattarar aljanu ba ne?”

Tajiri ya kwashe labarinsa da Ifiritu ya faɗa wa tsoho. Tsoho ya ce, haƙiƙa labarinka akwai ban al’ajibi da tausayi a cikinsa. Lalle ba zan bar nan ba sai na ga abinda zai kasance a gare ka. Ya sami wuri ya zauna.

Suna nan zaune, sai ga wani tsoho tafe ya na jaye da karnuka, baƙaƙe guda biyu. Tsoho mai karnuka ya yi sallama gare su. Bayan sun gaisa, ya tambaye su labarin zamansu wannan wuri wanda ya ke matattarar aljanu. Suka faɗa masa abinda ya ke faruwa. Da ya ji haka sai ya ce, lalle ba zan wuce ba har sai na ga abinda zai faru tsakanin Tajirin nan da Ifiritu. Ya sami wuri ya zauna.

Tsohon nan mai karnuka bai gama zaunawa ba, sai kuma ga wani tsoho tafe akan wata alfadara ramammiya. Da tsoho mai alfadara ya iso ya yi musu sallama, suka gaisa sannan ya tambaye su dalilin zamansu a wannan bigire. Suka labarta masa abinda ke faruwa. Shi ma ya ce ba zai wuce ba sai ya ga ƙarshen wannan al’amari. Ya sami wuri ya zauna.

Tajiri da tsofaffi na nan zaune sai suka riƙa jin wata irin hargowa, mai cike da rugugi da tsawa da iska mai tsanani tana kaɗawa, ƙasa kuwa kamar za ta tsage saboda rugugi da ƙugi. Ƙura ta tashi ta murtuƙe ko’ina, ta rufe hasken rana, ba a ganin komai tamkar a tsakiyar dare.

Yayin da hargowar nan ta lafa, ƙura ta yaye wuri ya koma dai dai, sai mutanen nan suka ga Ifiritu a tsaye da takobi zararre a hannunsa, idanunsa jawur tamkar garwashin wuta. Ya fizgo Tajirin nan daga cikinsu ya ce, tashi in kashe ka tamkar yadda ka kashe ɗana, sanyin zuciyata, farin cikin rayuwata.

Tajiri yana kuka yana kururuwa da hargowa, tsofaffin nan su ma suka fashe da kuka domin tausayin Tajiri. Sai tsohon nan na farko, mai barewa ya matso kusa da Ifiritu, ya durƙusa ya ce, “Ya kai wannan Ifiritu, Sarkin Sarakunan aljanu, da za ka tsaya in ba ka labarina da wannan barewa da nake tare da ita, da ka ji labarin abin al’ajabi wanda ba ka taɓa jin irinsa ba, amma sai idan ka yi alkawarin za ka ba ni wani yanki na jinin wannan Tajiri.”

Ifiritu ya ce, “Na yarda idan ka ba ni wannan labari na ga ya kasance abin al’ajabi da mamaki zan ba ka sulusin jinin wannan mutum.”

Tsoho mai barewa ya yi godiya ya fara ba Ifiritu da sauran mutanen da ke wurin labarinsa, da abin da ya kasance a gare shi tare da wannan barewa, kamar haka:

Tsoho na farko, mai barewa ya ce, ka sani ya kai wannan ifiritu, cewa wannan barewa ta kasance ‘yar baffana ce, na aure ta tun tana ƙarama. Mun zauna tsawon shekara talatin da ita amma Allah bai ba mu haihuwa ba. Sai na sayi kuyanga, na mayar da ita sa-ɗaka, Allah kuwa ya sa na haifi ɗa namiji tare da ita. Yaron nan ya kasance kyakkyawa, mai kyawun sura abin so da ƙauna ga kowa.

Bayan yaron nan ya kai shekara goma sha biyar, sai tafiya ta kama ni zuwa wani birni daga cikin birane. Na ɗebi guzuri na dukiya mai yawa domin ban san iyakar kwanakin da zan yi ba a wannan tafiya. Na tafi, na bar ɗana da uwarsa, da kuma matata, 'yar baffana a gida.

Wannan mata tawa, wadda ita ce wannan barewa da kake gani, ya kai wannan ifiritu, ta kasance masaniya akan bokanci da sihiri kala-kala tun tana ‘yar ƙarama. Don haka bayan tafiyata sai ta sihirce yarona ta mayar da shi bajinin sa, uwarsa kuma ta mayar da ita saniya, ta aika da su wurin mai yi mini kiwon dabbobina a daji, aka saka su a cikin garken shanu.

Bayan wani tsawon lokaci na dawo daga tafiyar da na yi, sai ban ga ɗana da uwarsa ba, na tambayi matata inda su ke. Sai ta ce da ni, ai bayan tafiyarka, kuyangarka ta mutu, ɗanka ya gudu ban san inda ya tafi ba. Wannan labari ya sa ni cikin baƙin ciki da ƙunar zuciya har tsawon shekara guda.

Lokacin da sallar layya ta zo, sai na aika wa makiyayina da ke ƙauye da ya aiko mini da saniya mai ƙiba kuma mai maiƙo domin in yi layya da ita. Wannan mata tawa sai da ta san yadda ta yi dabarar da ta sa makiyayin nan ya aiko mini da sihirtattar saniyar nan, wato kuyangata, uwar ɗana, a matsayin saniyar da zan yanka.

Da aka kawo saniyar, na tashi na cire rigata, na ɗauki wuƙa, bayan an kayar da ita an ɗaure ƙafafunta, na nufe ta da niyyar in yanka ta domin yin layya. Sai ta riƙa kuka da harbe-harbe, kamar za ta yi mini magana, amma babu baki. Sai tausayi ya kama ni, na ba wani yaron gidana wuƙar na ce ya yanka mini ita, ni kuwa na koma cikin ɗaki.

Bayan an yanka saniyar nan, wadda ta kasance kuyangata ce aka sihirce, da aka feɗe ta sai aka tarar ba ta da nama da mai sosai, daga fata sai ƙasusuwa, ni kuwa niyyata in yi layya da dabba mai nama da mai da yawa. Ganin haka sai na sake aika wa makiyayin nan da ya kawo mini wani bajini/bajimi mai nama da mai sosai. Matar nan tawa kuma ta sa aka kawo mini ɗan nan nawa da ta sihirce shi ya zama sa.

Yayin da aka zo da shi, yana gani na, sai ya tsinke igiyar da aka ɗauro shi da ita, ya rugo zuwa gare ni, ya yi kwance a gabana, kuma ya tashi yana kuki yana kuka, yana kewaya ni. Tausayinsa ya kama ni. Na ce, a mayar da shi a zo mini da saniya mai ƙiba da mai. Amma matata kuwa sai ta ce, ka yanka wannan sa domin yana da ƙiba kuma yana da mai sosai. Allah ya sa ban biye shawararta ba, domin tausayin shi ya riga ya kama ni. Aka mayar da shi.

Bayan kwana biyu, ina zaune, sai ga makiyayin nan nawa ya zo wurina, ya ce, ya shugabana, na zo ne in faɗa maka abin farin ciki da albishir. Na ce da shi, na’am, ina saurarenka.

Makiyayi ya ce mini, ya kai maigidana, na kasance ina da wata ‘ya tawa masaniyar sihiri, tun tana ƙarama ta ke a hannun wata tsohuwa, kakarta, wadda ita ce ta koya mata sihiri. Jiya bayan na koma da bajimin san nan da ba ka yanka ba, sai na tarar da ‘yar nan tawa ta zo gida domin bukin Sallah.

Yayin da na shiga da sa gida, ko da ‘yar nan tawa ta gan shi, sai ta rufe jikinta ta ce mini, ya babana, ta yaya za ka shigo mana da namiji, baligi, cikin gida? Bayan kuwa shi ba muharraminmu ba ne? Sai ta fashe da kuka. Na ce da ita, ina namijin da na shigo muku da shi? Sai ta daina kuka, sai kuma na ga tana dariya. Sai na tambayeta, me ya sa ki kuka? Me ya sa kuma yanzu kike dariya?

Ta ce da ni, wannan bajimin da kake tare da shi, ɗan shugabanmu ne, Tajiri, amma an sihirce shi ne, shi da mahaifiyarsa, kuma matar ubansa ce ta sihirce su. Amma abin da ya sa ni kuka shi ne, mahaifinsa ya sa an yanka uwarsa bai sani ba. Amma abin da ya sa ni dariya shi ne, zan iya kuɓutar da shi na mayar da shi ga siffarsa ta mutum, amma sai na yi sharaɗi da mahaifinsa.

Makiyayi ya ci gaba da faɗa mini cewa, na yi al’ajabi gayar al’ajabi, ban yi barci ba har hudowar asuba, domin na zo na sanar da kai wannan labari, ya shugabana.

Yayin da na ji wannan zance na makiyayina, ya kai wannan ifiritu, sai na ce da shi ya tashi maza mu tafi gidansa domin na ji sharaɗin da 'yarsa take so kafin ta mayar mini da ɗana siffarsa ta mutum.

Da muka iso, ‘yar makiyayi ta tare mu da murna, ta gaishe ni cikin ladabi da girmamawa. Da ɗan nan nawa ya gan ni sai ya taso ya zo ya kwanta a gabana. Na ce da ‘yar makiyayi, shin labarin da mahaifinki ya gaya mini ko gaskiya ne. Ta ce, na’am ya shugabana. Wannan bajimi da kake gani ɗanka ne.

Na ce da ita, idan kika kuɓutar da shi zan ba ki dukkan dukiyata da ta ke hannun mahaifinki. Sai ta yi murmushi, ta ce, ka sani ya shugabana, ba ni da kwaɗayi akan dukiyarka, zan kuɓutar da ɗanka amma akan sharuɗɗa guda biyu: Na farko, ka yarda na auri wannan ɗa naka, na biyu ka bar ni in sihirce wadda ta sihirce ɗanka da kuyangarka, ni ma in ɗaureta cikin sihiri tsawon rayuwarta. Idan ka yarda da waɗannan sharuɗɗa, yanzu zan mayar wa ɗanka da siffarsa.

Na ce, na amince da waɗannan sharuɗɗa, kuma na ƙara miki da dukiyar da ke hannun mahaifinki, ‘yar baffana kuwa, watau matata, ki yi duk abin da kika ga dama da ita.

Yayin da ta ji zancena ta ɗauki tasa, ta cika da ruwa, sannan ta yi wasu karance-karance ta tofa a cikin ruwan nan, sannan ta yayyafa wa bajimin sannan, ta ce, idan Allah ya halicce ka, ka kasance bajimi, to ka ci gaba da zama bajimi, idan Allah ya sa sihirce ka aka yi, ka juya ga siffarka ta asali, da yardar Allah Maɗaukakin Sarki. Nan take sai ya juye ya koma mutum, kamarsa ta asali. Na aura masa ‘yar makiyayin nan, ita kuma ce ta sihirce ‘yar baffan nan tawa zuwa wannan barewa da kake gani, ya kai wannan ifiritu.

Idan wannan labari nawa ya kasance mai ban al’ajabi a gareka ina son ka ba ni sulusin jinin wannan Tajiri da ya kashe ɗanka ba tare da ya sani ba.

Ifiritu ya ce, haƙiƙa wannan labari akwai abin al’ajabi a cikinsa, don haka na ba ka sulusin jinin wannan mutum.

DUBA WANNAN: Hikayar Ali Baba Da Barayi Arba'in (1)

Daga nan sai tsoho na biyu mai karnuka ya matso wurin Ifiritu, ya ce ni ma ina da labarin da zan ba ka akan waɗannan karnuka da kake gani, amma sai idan za ka ba ni sulusin jinin wanan mutum.

Ifiritu ya ce, faɗi labarinka mu ji. Tshoho mai karnuka ya fara labarinsa kamar haka:........

Ku ci-gaba da kasancewa tare da mu a kullum don samun ci-gaban wannan ƙayatacciyar hikayar da sauran zafafan hikayoyi duk a kyauta.

Karanta Sauran anan»

Kyakkyawan Gajeren Sakon Barka Da Safiya Ga Masoyiya

Assalamu alaiki ya ke wannar kyakkyawar da zuciyata ke bugawa da haruffan sunanta, kamar yadda kika sani cewa daidaiton kowacce gangar jiki a haɗa ta da ruhin ta to haka ni ma mahaɗin nawa farin cikin shi ne jin kyakkyawar amsar da za ta sanya annuri a cikin zuciyata saboda ke.

Gajeren Sakon Barka Da Safiya Ga Masoya

Hoto: Wallpapers

Marubuci:- Yaron MLM KD

Idan har yaƙinina ya zamto gaskiya a gare ki cewa kin tashi lafiya kamar yadda ni ma na tashi lafiya. To zan kasance mai matuƙar farin ciki da shauƙi na musamman.

Karɓuwar saƙona a gare ki shi ne karsashin da zuciyata za ta samu kamar yadda nake ji a sanadin ƙaunarki. 

BARKA DA SAFIYA masoyiyata, abar ƙauna, shalelena, hubbina, sahibata, nurul ƙalbina, matata, farin cikina da annashuwata da  shauƙina.

Karanta Sauran anan»

Karanta Addu'o'in Neman Tsayar Da Ruwan Sama

اَللَّهُمَّ حَوالَيْنَا وَلاَ عَلَيْنَا، اَللَّهُمَّ عَلَى اْلآكَامِ وَالظِّرَابِ، وَبُطُونِ اْلأَوْدِيَةَ، وَمَنَابِتِ الشَّجَرِ.

Allahumma hawalayna wala 'alayna, allahumma 'alal-akami wazzirab, wabutoonil-awdiyah, wamanabitish-shajar.

Daga cikin addu'o'in neman tsayar da ruwan sama

Hoto: Key life homes

Ya Allah! Ka sanya shi ya zuba a kewayenmu ba a kanmu ba. ya Allah! Ka sanya shi a kan jigayi da duwatsu, da cikin rafuka, da wajen saiwoyin itatuwa.

Karanta Sauran anan»

Karanta Gajerun Kalaman Tabbatar Da Soyayya Ga Masoyiya

Zan furta miki kalmar so a gare ki a duk yanayin da nake ciki. Zan ƙaunace ki a duk yanayin da kike ciki, ba zan guje ki ba.

Kalaman tabbatar da soyayya ga masoyiya

Hoto: Vescu

Marubuci:- Prince E

Hmm ke kaɗai ce jallin jal gimbiya shugabar gimbiyoyi, babu wacce ta isa ta kama farcen ƙafarki bare ke kanki. A wajena ke ce zaɓina.

A duk tsanani ko wuya, zan zauna da ke koda a lambun ƙaya ne.

Ina son ki so irin na ɗa da uwa.

Ina son ki so wanda bai da algus a ciki.

Ki riƙe mini alƙawari ya gwarzuwar sadaukiyar masoyiyata. Jarumar babban birnin alƙaryar zuciyata.

Ina son ki, so na gaskiya wanda ba

yaudara a ciki.

Ba na son maƙiyinki, koda kuwa ya

taimake ni a rayuwa.

Ki riƙe ni tamkar yadda na riƙe ki.

Ba na son maƙiyinki, koda

kuwa ya kashe maƙiyina.

Tsananin son ki yana neman zautar da ni, na kan rasa kaina a duk lokacin da tunaninki ya turnuƙe ni.

Na kan ji komai ya wadatu gare ni idan na ji kyakykyawar muryarki.

Karanta Sauran anan»

Karanta Tarihin Addinin Jainism A Takaice Tare Da Hotuna

Sunan Jainism  ya samo asali ne daga kalmar Sanskrit fi'ili ji, da ke ƙasar Indiya inda yake nufin  "Don nasara."  Yana nufin yaƙin da ake yi da zuciya don nasarar aikata kyawawan ayyuka, Jain (sufaye ) addinin yana koyar da mabiyansa cewa  dole ne su yi yaƙi da sha'awa da ji na jiki don samun wayewa, ko samun  tsarkin rai.

Tarihin Addinin Jainism  A Taƙaice

Marubuci:- Abdallah Aliyu Saint

Mafi ilimin cikinsu da manyan malamansu  ana kiransu Jina ( “Mai nasara”),  masu  bin wannan addini kuma  ana kiransu Jain (“Mabiyan Masu Nasara”).

Wasu 'yan asalin ƙasar Japan kenan da su zo har ƙasar Indiya domin shiga addinin Jainism

Hoto: All india roundup

Jainism ya kasance addini a cikin ƙasar India  kodayake ya ƙaura  zuwa wasu ƙasashe, yawancin ƙasashen Commonwealth da kuma Amurka.  Babu takamaiman ƙididdiga, amma an ƙiyasta cewa akwai Jain sama da miliyan shida, mafi yawansu suna zaune a Indiya.

Mabiya addinin Jainism

Hoto: voice of guides

Addinin yana koyar da tsarkin ruhi ta hanyar soyayya,tausayi, taimako ga dukkan abu mai motsi indai mutum yana kwatanta irin wannan shi ne suke kira wayayye.

Jains sun yi imanin cewa addininsu ba shi  da wanda ya samar da shi ko ya kafa shi.

Mabiyin addinin Jainism na farko wanda akwai hujjojin tarihi shi ne Parshvanatha (ko Parshva),  wanda wataƙila ya rayu a ƙarni na 7 KZ  a ƙalla shekara dubu ashirin kafin haihuwar Annabi Isa, ya fara wannan addinin ne bisa ga watsi da ƙyaleƙyalen duniya.

Mabiya addinin Jainism

Hoto: Jainsamaj

Littattafan su masu tsarki na Jainism  shi ne  Agams ko Agam Sutras.  Ya ƙunshi koyarwar Ubangiji Mahavir waɗanda almajiransa suka tsara ta hanyar Ilhama.

Mabiya addinin Jainism 

Hoto: GEO

LAIFI

Manyan laifuffuka a addinin jainism su ne;

1. Ƙarya.

2. Sata.

3. Zinace-zinace.

4. Rashin cika alƙawari.

Da rashin kame kai.

Mabiyin addinin Jainism yayin gabatar da wani bayani 

Hoto: Waybig7919/Reddit

Sannan sun yi imanin cewa duk wanda ya mutu ba ya aikata waɗancan ayyuka Ubangiji zai dawo da shi duniya a wani Basarake ko Mai Kuɗi ko wani Mai Cikakken Iko.

Mabiya addinin Jainism

Hoto: Times of India

Idan kuma ka saɓawa hakan za ka iya dawowa duniya a matsayin Dabba ko Kare ko Jaki, ka yi ta shan wahala.

Mabiyan Jainism

Hoto: Faith invest

Sukan ajiye wani abu mai kama da ɗaki suna zagaya shi sanye da fararen kaya, duk shekara domin neman albarkar Ubangijinsu game da noma haihuwa, kiwo da sauran albarkatun yau da gobe.

Karanta Sauran anan»

Yadda Za Ku Sauya Rayuwar Ku A Rabin Shekara Kacal (3)

Shawara

Domin fahimtar inda aka dosa dole sai mutum ya koma baya daga fitowa ta biyu (2). Latsa nan don komawa ga fitowar da ta gabata.

Sauya rayuwa a watanni 6

Hoto: Legends recovery

Kun san me yasa ne wai?

Ba damuwa take tsoro ba, kwanciyar hankali take tsoro.

Haka da yawa sai ka ga maƙasƙanci amma yana tsoron ɗaukaka.

Ka ga mara lafiya yana tsoron zuwa ganin likita.

Mai ƙaramar sana'a yana tsoron barin ta zuwa babba. Haka dai, haka dai.

3. Tsoron ra'ayin mutane

Ɗan Adam kenan, sau da dama ɗabi'arsa ce take cutar da shi saboda bai iya sarrafa zuciyarsa ba.

Yana rayuwa cikin ruɗani saboda yana tsoron tunkarar zahiri.

Kana tsoron mutane su ƙalubalance ka ko su yi mamakin ganin sauyi a cikin yanayin ka.

Babu abin da yake janyo haka face ruɗar kai da rayuwar ƙarya.

Kana tsoron ka koma makaranta saboda ana ganin ka a matsayin mai ilimi?

Kana tsoron ka fara neman kuɗi saboda abin da wasu za su yi tunani, amma fa ka san cewa kai talaka ne?

Kana tsoron rabuwa da su saboda kada su ga ka ɗauki hanyar ci-gaba a rayuwar ka?

To amma fa ka san ba ku ƙarar da juna wani abu mai amfani a rayuwa ba.

Mafita anan shi ne;

1. Ka fifita kanka a kansu. Idan abin da za ka yi zai taimaki rayuwar ka, ina ruwan ka da tunanin wani?

2. Ka yarda da gaskiya, ka bar ɓoye-ɓoye da ruɗar kanka.

Kai talaka ne, kai talaka ne.

Ba ka da ilimi, to ba ka da ilimi.

Ka yanke hukuncin ciyar da rayuwarka gaba. Don haka ba za ka iya mu'amala da su ba shikenan.

Shi sabo yana gwada juriyar ka ne da jumurin ka.

Mai jumurin yin haƙuri ne kawai zai iya rabuwa da wata ɗabi'a ko wani mutum da suka daɗe a tare da juna.

Shi kuma tsoro, yana gwada bajintar ka da ƙarfin halin ka da imanin ka.

Idan kana da bajinta da sadaukarwa, za ka ci galaba a kan dukkan wani tsoro da ya bijiro ga tafarkin ka.

Amma tsoron ra'ayin mutane, yana gwada son da kake yi wa kanka ne, da yarda da kanka da kuma damuwar ka a kan goben ka.

Idan kana son kanka, kuma ka damu da goben ka ta yi kyau, za ka daina damuwa da ra'ayoyin mutane game da rayuwarka.

DUBA NA GABA: Yadda Za Ku Sauya Rayuwar Ku A Rabin Shekara Kacal  (4)

Akwai wasu dodanni ban da waɗannan, amma guda ukun nan sun fi tsoratarwa da kawo cikas ga mutane.

Mun gama da bayanin Rusau saura na Ginau.

Mu haɗu a fitowa ta gaba da yardar Allah, inda za mu tattauna yadda ake gina sabon hali ko ɗabi'a da yadda mutum zai canza rayuwarsa da gaske ta hanyar aikinsa.

Babu rayuwar da za ta zo gare ka face rayuwar da ka ginawa kanka ita. Makomar ka a hannuwan ka take!

Turawa wani da ka san yana buƙatar wannan saƙon.

Da fatan kun ji daɗin wannan saƙon? 

Ku ci-gaba da bibiyar mu don samun saƙonni masu zaburarwa da za su inganta rayuwar ku a cikin harshen Hausa.

Za mu ci-gaba Insha Allah.

Tushe/Asali: Hausa Motivation 

Karanta Sauran anan»

Kalaman Soyayya Gauraye Da Turanci Da Hausa Masu Dadi

Salam Alaiki, beautiful, mai ƙaunata, mai ƙamshin apple, darajarki ta fi ta pineapple, ballantana ki sa kaya mai launin purple, ai dole ne a ce miki wonderful, na ranste ko a cikin school kin fi ƙarfin a ba ki kyautar bicycle. To ki ji tsoron Allah merciful, ki gujewa hawa motor cycle, tunda dai Allah ya ba mu tricycle, idan kin ji tsoron Allah merciful, to sai ki zauna peaceful, sai ki shiga aljanna successful.

Kalaman Soyayya Gauraye Da Turanci Da Hausa Masu Daɗi 

Hoto: Dreamstime

Marubuci:- Prince E

Ke ce wacce zuciyata ta natsu cikin alƙaryar son ta.

Ba ni da wani abin tinƙaho a duniyar masoya face ke saraauniyar zuciyata, ma'abociyar kyau da kwalliya.

Ke ce mafi kusanci ga zuciyata.

Ke kaɗai ce wacce zuciyata ta yarda kuma ta aminta da kyawawan ɗabi'unta.

Furen soyayyarki ya fi kowanne fure saurin yaɗuwa a cikin zuciyata.

Na kai ƙololuwa cikin sararin samaniyar ƙaunarki, babu wani abu wanda ya kasance yana da saurin tasiri a cikin zuciyata face daga gare ki yake.

Ke ce wacce kalamanta ke sanyaya min zuciyata.

Ke ce wacce murmushinta yake jefa ni cikin shauƙi.

Karanta Sauran anan»

Ka Lura Da Abokan Ka Ko Aminan Ka

Tara abokai a wannan zamanin abu ne mai matuƙar sauƙi, kowa zai iya zama abokin ka amma ba lallai ba ne kowa kuma ya zama aminin ka.

Tara abokai

Hoto: Vancomm

Marubuci:- M. Kabiru Muhammad

Ka yi nazari kafin ka yanke shawarar zaɓar amini, aminintaka tana da amfani sosai amma kuma tana da matuƙar haɗari a wannan zamanin da muke ciki.

Wanda ka aminta da shi , da shi za'a haɗa hannu wajen cin amanar ka, zai nuna maka shi masoyin ka ne na haƙiƙa, da ma kaɗan yake jira domin cimma manufar shi a kanka, da zaran ya biya buƙatar shi za ka neme shi ka rasa, tamkar ba ku taɓa kasancewa a tare ba, ko haɗuwa ku yi da shi sai ka ga yana kame-kame domin a lokacin ba ka da wani sauran amfani a gare shi.

A mafi yawancin lokuta idan hali ya zo ɗaya to aminantaka ta kan zo cikin sauƙi.

Ka zaɓi amini nagari ba amini na banza ba, ba lallai ba ne kowa ya zama mutumin kirki, haka ma ba lallai ba ne kuma kowa ya zama mutumin banza.

Allah ya zaɓa mana abokai nagari, ya kuma sanya su zama alkhairi a gare mu duniya da lahira Amin.

Karanta Sauran anan»

Hikayar Ali Baba Da Barayi Arba'in (7)

Da gari ya waye, Ali Baba ya fito farfajiyar gidan domin su gaisa da baƙonsa, ga mamakinsa sai ya ga ƙofar ɗakinsa a buɗe, babu baƙo babu alamunsa, amma kuma ga dabbobinsa nan da kuma hajarsa ta mai.

Hikayar Ali Baba Da Barayi Arba'in Kashi Na 7

Hoto: Zu 09/iStock Photo 

Yana nan tsaye yana mamakin inda baƙonsa ya shiga, sai ga kuyangarsa Murjanatu ta fito, ta durƙusa ta gaishe shi.

Ya tambaye ta, ko ta ji motsin baƙonsa? Domin tagar ɗakinta na kallon farfajiyar gidan ne, duk wani motsi da za a yi a farfajiyar gidan Murjanatu za ta iya ji daga cikin ɗakinta. Ta ce da Ali Baba, "Maigida zo ka duba da idonka, ka ƙara yi wa Allah godiya, da ya kuɓutar da kai." Ta ja shi har zuwa wurin da jakunkunan mai suke, ta ce ya buɗe ɗaya da kansa ya ga abin mamaki.

Ali Baba ya buɗe jakar mai ɗaya, sai ya ga mutum a ciki, riƙe da takobi. Ya juya zai gudu cikin tsoro, Murjanatu ta dakatar da shi. Ta ce, "Wannan mutum da kake gani ba zai iya cutar da kai da komai ba domin kuwa ba shi da rai. Mutum talatin da bakwai ne, duk Allah ya ba ni nasarar kashe su da tafasasshen mai." Ta kwashe labarin abin da ya faru duka tun daga lokacin da ta ga ana yi wa gidansu lamba, da kuma yadda ta zo ɗibar mai a cikin hajar baƙo, ta gane mutane ne a ciki, da yadda ta ƙona su da mai, da kuma yadda ta ga shugaban ɓarayi ya buɗe gida cikin dare ya arce, da ya gano cewa an kashe masa mutane.

Ali Baba ya yi mamaki a kan hikima da kuma dabara ta wannan yarinya, gayar mamaki. Ya gode mata, godiya mai yawa, kuma ya yi mata albishir da wata kyauta mai tsoka, amma bai faɗa mata ko mene ne ba. Ya tura ta ta kira masa wani bawansa mai suna Abdallah.

Da Abdallah ya zo, Ali Baba ya faɗa masa abin da ke faruwa. Ya ce yana so su tafi lambun da ya ke cikin gidan su gina ƙaton rami mai faɗi da zurfi, wanda zai iya ɗaukar ɓarayin nan duka, su rufe su ciki. Ali Baba ya taimaka wa bawansa Abdallah suka gina ƙaton rami, Allah ya taimake su akwai danshi a cikin lambun, saboda haka ba su sha wata wahala ba wurin haƙa ramin.

Suka riƙa cicciɓo gawar ɓarayin nan, ɗaya bayan ɗaya, suna jefawa cikin ramin duk da jakunkunan da suke ciki, har suka jefa su duka. Suka mayar da ƙasa suka rufe. Ali Baba ya gargaɗi bawan nan, duk da yake ya san amintacce ne, a kan kada ya kuskura ya yi wannan zance da kowa a waje. Jakan ɓarayin nan kuwa, sai Ali Baba ya riƙa ɗibar biyu, uku, yana tura Abdallah da su kasuwa yana sayar masa, tunda ba wani amfani zai yi da su ba, har suka ƙare.

Shugaban ɓarayi kuwa da ya gudu daga gidan Ali Baba, sai ya koma maɓoyarsu a cikin daji. Ba da jimawa ba, kaɗaici da kuma tsoro suka lulluɓe shi, ya ji kwata-kwata ba zai iya zama shi kaɗai a cikin daji ba. Saboda haka sai ya ɗebi wani abu daga cikin dukiyar nan, ya yi shiri kamar wani baƙon alhaji, ya koma cikin gari.

Da ya isa cikin gari sai ya tasar wa fada. Aka yi masa iso gun Sarki, ya ce shi baƙo ne, sunansa Koja Husaini, yana so ya zauna a cikin wannan gari idan Sarki ya yarda, idan ma zai samu gida na siyarwa, to zai siya ya zauna a ciki. Sarki ya sa dillalai suka nemo wa Koja Husaini gida, aka yi ciniki ya biya. Kwamfa! Ashe gidan kuma yana makwaftaka ne da tsohon gidan Ali Baba wanda ya tashi a ciki, ya koma gidan Kasim, wanda kuma yanzu babban ɗansa ne, saurayi ɗan kimanin shekaru ashirin da uku, a ciki.

Koja Husaini ya tare cikin sabon gidansa, lokaci-lokaci kuma ya kan koma maɓoyarsu ya ɗebo wani abu daga cikin dukiyarsu, wadda yanzu ta zama mallakarsa shi kaɗai. Amma ya kan yi taka-tsan-tsan duk lokacin da zai tafi, domin kada ya ja hankalin mutane su fara zarginsa. Kullum zuciyarsa cike take da tunanin hanyar da zai bi ya kashe Ali Baba.

Sannu a hankali Koja Husaini ya fara sabawa da maƙocinsa, ɗan Ali Baba, duk da yake ba sa'arsa ba ne, har ta kai ga wani lokaci suna zaunawa su yi ta hira a tsakaninsu.

Ana nan wata rana sai Ali Baba ya kawo wa ɗansa ziyara a gida, a lokacin kuma Koja Husaini na zaune a ƙofar gidansa, ƙarƙashin wata bishiya, yana hutawa. Da ganinsa, nan take Koja Husaini ya shaida shi. Ali Baba ya shige gidan ɗansa, bai ko lura da wani mutum ba, ballantana ya lura da ana kallonsa.

Bayan wani lokaci, Ali Baba ya fito daga gidan ya yi tafiyarsa. Ba a daɗe ba kuma sai ga ɗansa ya fito, da ya ga Koja Husaini zaune a ƙofar gidansa, sai ya nufi can domin su yi hira. A cikin hirar tasu ne Koja Husaini ya fahimci cewa wannan yaro, wanda ya zama tamkar abokinsa a halin yanzu, ɗan Ali Baba ne, babban maƙiyinsa a duniya. Don haka sai ya raya a zuciyarsa, bari ya ja shi a jika, wata ƙila ta sanadiyarsa zai cimma burinsa na kashe Ali Baba.

Tun daga wannan rana sai alaƙar Koja Husaini da Ɗan Ali Baba ta ɗauki sabon salo. Koyaushe Koja Husaini ba ya da wani aboki da ya wuce Ɗan Ali Baba, ya yi ta jan sa a jika har suka shaƙu da juna suka zama tamkar abokai sa'o'in juna.

Ina ya Allah, babu ya Allah! Ana nan sai matar Ali Baba ta haihu. Tun kafin ranar suna Ali Baba ya shirya wata 'yar gajeruwar liyafa ta cikin gida, watau iyalansa da barorinsa kawai. Da Ɗan Ali Baba zai je wurin liyafar sai ya gayyaci babban abokinsa, Koja Husaini, domin ya raka shi. Koja Husaini ya yi matuƙar farin ciki a ransa, damar da yake ta faman jira kwana da kwanaki yanzu ta samu. Idan suka tafi, zai yi iyakar ƙoƙarin sa ya keɓe da Ali Baba wani wuri, inda babu kowa, ya kashe shi ya gudu, lokacin da duk hankulan iyalansa suke wurin liyafar. Sai ya dauki wata sharɓeɓiyar wuƙa ya sulle ta a cikin rigarsa, suka tafi.

Ko da suka isa gidan, komai ya kankama. Ɗan Ali Baba ya gabatar da abokinsa ga mahaifinsa, sannan suka sami wuri suka zauna. Duka-duka wurin liyafar bai wuce mutum biyar zuwa shida ba; Ali Baba da matarsa, Ɗan Ali Baba da abokinsa Koja Husaini, Abdallah bawan Ali Baba, sai kuma yarinya Murjanatu da take ta faman kawo kayan ciye-ciye da shaye-shaye.

Murjanatu na cikin rarraba abinci ga mahalarta liyafa har ta zo kan Koja Husaini. Tana ganinsa, nan take ƙwaƙwalwarta, mai kama da kwamfuta, ta gane shi. Shugaban ɓarayn nan ne ya sake dawowa. Tabbas wannan zuwan ma, akwai manufar da ya zo da ita, ba liyafar ce ta kawo shi ba. Ta kanne abin a cikin ranta, ba ta ce komai ba, ba ta kuma nuna alamun komai ba, tana tunanin hanyar da za ta yi maganin wannan ɓarawo.

Bayan liyafa ta kankama, kowa ya fara motsa bakinsa da abin da aka tanadar. Tuni kuma Murjanatu ta gano wata dabara da za ta kashe wannan ɓarawo. Ta raɗa wa bawan nan Abdallah, ya ɗauko dundufarsa ya fara kiɗa ita kuma za ta yi rawa, kamar yadda suke yi wa Ali Baba a duk lokacin da yake buƙatar nishadi. Abdallah ya jawo dundufarsa ta kiɗa, ya fara kaɗawa a hankali, dama kuma gwanin kiɗa ne, ita kuma Murjanatu ta tashi ta fara taka rawa, abin gwanin ban sha'awa.

Al'adar garin ce, idan mace tana rawa a cikin maza, ta kan riƙe wata 'yar ƙaramar wuƙa a hannunta. Idan ta yi rawa, ta yi juyi, sai ta zo gaban mutum ta ɗaga wuƙar nan kamar za ta daka masa ita a zuciya, sai ta juya wuƙar ta daka masa mariƙin wuƙar. Sai a yi tafi, a yi shewa, ta haka ake gane namiji mai tsoro da kuma jarumi. Duk ƙasar kowa ya san da wannan al'ada, hatta Koja Husaini ya san da haka.

Saboda haka lokacin da Murjanatu za ta fara rawa, sai ta ɗauko 'yar ƙaramar wuƙa ta riƙe a hannunta, tuni ta ayyana abin da za ta yi a cikin ranta. Ta fara rawa tana juyi, ta zo kan mai kiɗa, Abdallah, ta ɗaga wuƙar kamar za ta daɓa masa ita, sai ta daɓa masa ƙotarta, aka yi tafi. Ta wuce wurin Ɗan Ali Baba, ta yi kamar yadda ta yi wa Abdallah, ta wuce. Ta je kan Shugaban ɓarayi, ta ɗaga wuƙar nan, ta tattara iyakar ƙarfinta a hannunta mai wuƙar ta kirɓa masa ita a ƙahon zuciya. Nan take ɓarawo ya faɗi ƙasa yana shure-shure har ya mutu.

Ko da Ali Baba da ɗansa suka ga wannan ɗanyen aiki da Murjanatu ta aikata, wanda ba su san dalili ba, sai suka taso mata, hankalinsu a tashe, suka far mata da faɗa, don me za ta kashe baƙon da suka gayyato, laifin me ya yi mata. Murjanatu ta dakatar da su, sannan ta bayyana musu ko wane ne wannan baƙo, sannan ta ce musu, "Duk da yake ban san manufar da ya shigo da ita wannan gida ba, amma na tabbata manufarsa ba ta alheri ce ba."

Da suka duba jikin shugaban ɓarayi, sai suka samu sharɓeɓiyar wuƙa sulle a cikin rigarsa. Wannan shi ne karo na biyu ke nan da Murjanatu ta kuɓutar da rayuwar Ali Baba daga halaka. Saboda haka yanzu ne zai sanar da ita albishirin da ya ɓoye mata a cikin zuciyarsa, wanda kuma ya taɓa furta mata.

Ali Baba ya dubi Murjanatu ya ce, "Daga yau na 'yanta ki, kin zama 'ya mai cikakken iko, kuma idan kin yarda ina so ki amince da ɗana ya zama mijinki." Sannan ya juya wurin ɗansa ya ce da shi, "Ya kai ɗana, na san da cewa ba za ka ƙi amincewa da zaɓina ba, ka amince na aura maka Murjanatu domin na tabbata ta dace da kai, kuma ba domin ita ba da wannan abokin naka ya sami galaba a kaina, dama ya yi ƙoƙarin yin abota da kai ne domin ya samu ya kashe ni. Na tabbata da buƙatarsa ta biya, kai ma ba zai bar ka ba. Don haka wannan yarinya ita ce sanadiyar kuɓutarmu gaba daya."

Murjanatu da Ɗan Ali Baba suka amince da junansu. Bayan 'yan kwanaki aka ɗaura musu aure, aka sha biki aka watse, mutanen gari suka yi ta sa albarka, a kan wannan karimci da Ali Baba ya yi wa yarinya Murjanatu, ga ta baiwa amma ya 'yanta ta kuma ya aurar da ita ga ɗansa, da ma yarinya ce mai ladabi. Duk mutanen gari babu wanda ya san abin da ya faru.

Ali Baba bai ƙara komawa maɓoyar 'yan fashin nan ba, domin yana gudun ya haɗu da sauran ɓarayin nan biyu da bai san abin da ya same su ba. Da aka shekara ya ga babu wata barazana da ɓarayin nan suka ƙara yi masa, ran nan sai ya shirya ya faki idon mutane ya ɗare saman dokinsa, ya nufi dajin. Ya ɗebo dukiyar ya aza kan dokinsa ya hawo ya dawo.

Haka Ali Baba ya ci gaba da zuwa dajin nan daga lokaci zuwa lokaci, yana ɗebo dukiyar da ɓarayin nan suka tara yana kawo wa gida, sai dai duk lokacin da ya je ya kan yi sauri ya ɗiba ya dawo don tsoron kada sauran ɓarayin biyu su tarar da shi. Ya ci gaba da yin haka tsawon shekaru, ya kwashe dukiyar duka ya kawo gida, kuma yana ci gaba da kasuwancinsa a kasuwa, don haka babu wanda ya san sirrunsu. Ya zamana babu mai arziki duk faɗin ƙasar kamar Ali Baba.

Ya yi zamansa shi da iyalinsa cikin jin daɗi da kwanciyar hankali, har mai rabawa ta zo ta raba su.

ƘARSHE 

Ga waɗanda ba su samu damar karantawa ba tun daga farko ba, to su kwantar da hankalin su, su latsa nan don komawa ga shafin farko na labarin ko kuma nan....

DUBA WANNAN: Hikayar Ali Baba Da Barayi Arba'in (1)

Alhamdulillah! Wannan shi ne ƙarshen hikayar Ali Baba da Ɓarayi Arba'in, wacce muka kwashe tsawon makonni bakwai muna kawo muku.

Idan Allah ya kai mu litanin mai zuwa, za mu zaƙulo muku wata hikayar mai daɗi da kuma ilmantarwa, wacce ma ta fi wannan.

Allah ya kai mu.

Tushe/Asali: Waziri Aku

Karanta Sauran anan»

Abubuwan Da So Yake Korewa

So, a wani lokacin ya kore hankali sai ya tabbatar da hauka. Wani lokacin kuma ya kore hauka ya tabbatar da hankali.

Abubuwan Da So Yake Korewa 

Hoto: Adil Azeem/Pinterest

Marubuci:- Idris M Rismawy

So, shi ne yake kore abin da yake anan, kuma wani lokacin ya tabbatar da abun da babu shi.

Gane waɗannan kalaman sai waɗanda Allah ya nufa.

Karanta Sauran anan»

Yadda Za Ku Sauya Rayuwar Ku A Rabin Shekara Kacal (2)

Mun fara bayani a kan matakai goma da za su canza rayuwarka a cikin wata 6. Mun tattauna daga matakai na 1 zuwa na 3. Ya kamata mai karatu ya maida hankali a nan sosai, saboda a nan babban aiki yake.

Yadda Za Ku Sauya Rayuwar Ku A Rabin Shekara Kacal

Hoto: Protofuse

4. Ka canza wani abu da kake yi a kullum.

Masana suna cewa sirrin nasararka yana ɗauke a cikin tsarin yininka/wuninka (daily routine).

Bi ma'ana abin da kake yi kullum a rayuwarka daga safiya zuwa dare.

Ka tambayi kanka mana, ta yaya kake tafiyar da lokacinka, daga farkawarka daga barci har zuwa lokacin komawa shimfiɗarka?

Lokaci kam babu mai ja da muhimmancinsa saboda Allah da kanSa ya rantse da shi fiye da sau 10 a cikin Alƙur'ani Mai girma.

Allah ya rantse da Alfijir, Ya rantse da lokacin Asuba, Ya rantse da lokacin hantsi, Ya rantse da yini/wuni, da kuma dare, sannan Ya rantse da zamani gabaɗayansa.

To amma ta yaya za ka gano abin da za ka canza na tsarin yininka/wuninka?

Ka koma ka binciki waɗannan abubuwan:

1. Matsalolinka da ka zayyano a mataki na farko, da....

2. Manufofin da ka ayyana a mataki na biyu da kuma...

3. Abubuwan da suke shagaltar da kai da ka lissafa a mataki na uku (No.3).

Idan ka gano waɗanan gabaɗaya, to akwai wani GAGARUMIN AIKI a gabanka.

A nan ne za ka yi amfani da wani tsari na Rusau da Ginau mai muhimmanci.

RUSAU

1. Ka rusa, ka zare, ka goge, ka gusar, ka kawar da duk wata ɗabi'a, ko hali, ko shagala, ko yanayi, ko aiki, ko mutumin da ba ya ƙarfafa ka wurin isa ga burinka da ka ayyana a lamba ta 2.

A wannan matakin, za ka rabu da abokai da kuke zaman banza tare da su ba kwa tattauna wani abu na ci-gaba ko fa'ida a rayuwa.

Za ka rabu da budurwa/saurayi da kuke yaudarar juna, kuna ɓatawa juna lokaci da rayuwa alhali kun sani sarai ba auren juna za ku yi ba.

Za ka rabu da kallon fim, ko ka ba shi hutu, za ka rage hawa kan shafukan sada zumunta, idan so samu ne ma ka goge manhajojin (Apps) daga wayarka sai wanda ya zame maka tilas.

Idan ya zama dole sai ka hau shafukan sada zumunta don wani dalili, 

To ya zama dole ka yi;

- "unfollowing"

- ko "blocking"

- ko "unfriending" duk wani mutum ko shafi da ba ya bada gudunmawa wurin ci-gaban kanka da tunaninka, da sana'arka, ko iliminka, ko imaninka, ko auratayyarka da sauransu.

Dole ki yi blocking duk wani shashasha da bai san ciwon kansa ba yake zuwa inbox yana damunki da saƙonni na shiririta da shirme. Yin hakan taimakon kanki ne da ma shi kansa.

Dole ne ka rabu ka ja da baya da masu kashe maka gwiwa a kan manufofinka waɗanda komai ka ɗauko sai su ce maka ba zai yiwu ba.

Dole ki nisanta kanki daga duk wata ƙawa ko 'yan uwa masu kashe miki gwiwa akan sana'arki ko kasuwanciki ko aikin hannunki da kike rufawa kanki asiri a sanadinsa.

GINAU 

Idan ka kawar da dukkan waɗannan sai ka musanya su da ɗabi'u, da halaye, da ayyuka, da mutane masu taimakonka da ba ka ƙarfin gwiwa.

Amma kamar yadda na faɗa a baya, mutane da yawa ba za su iya wuce wannan matakin ba.

Sun gwammace su ci-gaba da wanzuwa a cikin yanayin da suke na rashin ma'ana, da salwantar da lokaci, da kasancewa tare da mutane masu hana su ci-gaba, da kuma riƙo da munanan ɗabi'unsu masu wuyar bari.

Idan ba za ka iya samar wa kanka da sauyin da rayuwarka take buƙata ba, za ka ci-gaba da rayuwa ne a cikin nadama.

Shi yasa muka yi alƙawarin yin bayani a kan wasu dodanni da dole mutum ya yaƙa domin wuce wannan matakin.

Su ne kamar haka:

1. Sabo

Na farkonsu kuma mafi illa a cikinsu shi ne sabo, wato abin da rai ko jiki ko zuciya ta saba da shi tsawon wata da watanni ko ma shekaru, rabuwa da shi ya kan yi mata matuƙar wahala.

Don haka dodo na farko kuma yaƙi na farko da za ka gwabza shi ne ka yaƙi kanka da kanka.

Ka ɗauka kamar mutum ne kai wanda ya daɗe yana cin wani abinci mai daɗin gaske amma kuma yana ɗauke da guba a ciki.

Shin daɗin wannan abincin da tsawon lokacin da ka ɗauka kana cin shi dalili ne da zai sa ka bar abincin ya kashe ka?

2. Tsoro

Dodo na biyu shi ne tsoro.

Shin hakan ma zai yiwu kuwa?

Shin zan iya yin nasara? Zan iya rayuwa idan babu wane da wance?

Akwai wani babban mutum da ya taɓa yin wata magana wacce har ila yau ta tsaya mini a rai. Yana cewa, "Mutane da yawa ba gazawa (failure) suke tsoro ba, nasara (success) suke tsoro."

Sai ka ga mutum cikin tsananin talauci ko sisi ba ya da shi, amma idan ka kawo masa wata dama ta aiki ko sana'a sai tsoro duk ya bi ya kame/kama shi.

Shin akwai wani abun tsoro ne dama da talauci, amma yin kuɗi yake tsoro ba talauci ba.

DUBA NA GABA:  Yadda Za Ku Sauya Rayuwar Ku A Rabin Shekara Kacal  (3)

Mutum yana soyayya da wata tana matuƙar cutar da shi, ko yana wulaƙanta ta idan mace ce, amma yana ko tana tsoron rabuwa da su.

Za mu ci-gaba Insha Allah.

Tushe/Asali: Hausa Motivation 

Karanta Sauran anan»

Gajeren Sakon Budurwa Na Soyayya Ga Saurayin Ta

Ina son ka tamkar yadda ba zan iya bayyana maka ba. Ina sonka tamkar yadda ba za ka iya ƙirga adadin ruwan sama ba.

Saƙon Budurwa Na Soyayya Ga Saurayin Ta

Hoto: Dr. Jim Collins

Marubuci:- Abba Rabi'u

Ɗawainiya nake da son ka a cikin zuciyata, da sannu za ka fahimci ni masoyiyarka ce ta haƙiƙa.

Kada ka zubar da hawayenka, yayin da wani ya ɓata maka rai, tuna da wacce kake so, kake kuma ƙauna, sai zuciyarka ta yi fari.

Na zana zanen fulawar so a tafin hannuna na yi nufin nuna maka domin ka fahimci yanayin matsayin da son ka ya yi a cikin zuciyata.

Karanta Sauran anan»

Sirrin Yadda Ake Kirkirar Sana'o'i Masu Kawo Riba Sosai

Ina da shawara ta ƙirƙirar sabuwar sana'a, yaya zan fara? Ka daidaita wannan shawara da kadarorin da kake da su a ƙasa. Misali, idan ka san yadda ake ɗinki, to sai ka yi tunanin wani sabon salo da tsarin ɗinka kaya ta yin amfani da shago da kuma keken ɗinkin wani wanda kake mutunci da shi, ko ya ba ka haya, har sai ka samu ƙwarewa, da fahimtar kasuwa da kuɗaɗen da za su ishe ka sayo naka keken. Kar ka yi garajen kama ƙaton shago da sayo kayan aiki nan take. 

Sirrin Yadda Ake Kirkirar Sana'o'i Masu Kawo Riba Sosai

Hoto: Getty Images

Marubuci: Bello Galadanchi

Ka fara da 'yar ƙaramar sana’a, sai ka girma a tsanake. Ka kashe kuɗaɗen da ba za ka gurgunce ba idan sana’ar ta karye, ko kuma albashin da kake samu na watanni uku a shekara.

Hakan zai ba ka damar gwada wannan sabuwar sana’a, ta yadda idan ka samu akasi, to ba za ka karye baki ɗaya ba, kuma za ka iya yin nazarin kuskuren da ka yi, sai ka sake gwadawa. 

Idan kana da fasaha, to kar ka ƙirƙiri abu daga farko, idan har akwai irin shi a kasuwa. Ka sayo na kasuwar, sannan ka nazarce shi, kuma ka yi tunanin yadda za ka inganta shi. Idan ka yi sa’a kuma ka samu alheri bayan inganta na kasuwa, to daga nan kuma za ka iya zuba jari mai tsoka domin ƙirƙirar naka sabon salon, a dai-dai lokacin da kake ci-gaba da samun kuɗaɗen shiga daga tsohon salon.

Ka zama kana da tarko mai inganci, yadda idan tsuntsun ya ƙwace, to ba zai gudu da tarkonka ba.

Karanta Sauran anan»